Nasha Alwashin Dawo Da Martabar Jam’iyar PDP Idan Na Zama Shugaban Jam’iyya – Edward Auta
Dan takarar Shugabancin Jam’iyyar PDP na jihar Kaduna Edward Pama Auta, ya bayyana aniyarsa na dawo da martabar Jam’iyyar da haɗa kan daukacin ‘ya’yan jam’iyyar a matakai daban-daban idan ya samu nasarar lashe zaɓen Shugabancin Jam’iyyar wanda za’a gudanar nan gaba kadan.
Edward Pama Auta, ya bayyana haka ne yayin da ya kaiwa tsohon Shugaban jam’iyyar PDP na kasa Kuma tsohon Gwamnan jihar Kaduna Sanata Ahmed Mohammed Maƙarfi a gidansa dake Kaduna domin neman goyon bayansu inda yayi Alkawarin Farfado Da martabar Jam’iyyar.
Auta, ya tabbatarwa tsohon Shugaban cewa idan ya samu damar zama shugaban jam’iyyar PDP zai tabbatar da cewa ya kara haɗa kan ‘yan jam’iyyar da kuma dorawa akan irin gudummawar da tsohon Gwamnan ya tsaya wajen samar da zaman lafiya a fadin jihar Kaduna.
Yace jihar Kaduna ba zata mance da irin gudummawar da Makarfi ya kawo ba wajen samar da ayyukan ci gaba da samar da zaman lafiya wanda ba za’a taɓa mantawa da shi ba.
” Na kawo maka wannan ziyarace domin neman goyon bayan ka da bayyana maka aniyata na yin takarar shugaban jam’iyyar PDP na jihar Kaduna Wanda idan na samu nasara ba zan baka kunya ba wajen bunƙasa cikin ci gaban jam’iyyar a faɗin jihar baki ɗaya” inji shi.
