Yan bindiga sun hallaka ‘yan sanda har su biyu tare da cinna wa ofishinsu wuta a Jihar Anambra
Wasu da ake zargin ‘yan bindiga sun ƙona ofishin ‘yan sanda na Umunze da ke karamar hukumar Orumba ta Kudu a jihar Anambra tare da kashe ‘yan sanda biyu.
Rahotanni sun ce ‘yan bindigar sun kai hari ne a ofishin ‘yan sandan tare da amfani da ababen fashewa, inda suka yi ta harbe-harbe, yayin da wani ɓangare na ofishin ke ci da wuta.
An ruwaito cewa harin ya yi sanadiyar mutuwar jami’an ‘yan sanda biyu da ke bakin aiki a lokacin da suka yi ƙoƙarin tinkarar maharan.
Jaridar Daily Trust ta ruwaito kakakin ‘yan sandan jihar Anambra, SP Tochukwu Ikenga, na tabbatar da faruwar lamarin, inda ya ce an gano gawawwakin ‘yan sandan da suka rasu, an kuma garzaya da su ɗakin hutu a asibiti.
Ya kuma ƙara da cewa jami’an tsaro na haɗin gwiwa da suka haɗa da ‘yan sanda da sojojin ƙasa da na ruwa da na Civil Defence da kuma sauran hukumomi, sun gano wasu abaubuwan fashewa guda biyar da ba su kai ga tashi ba, kuma suna bin tsawun ƴan bindigar domin cimmu su.
