Rahotanni daga Ingila na bayyana cewa an kama dan wasan tsakiya na kungiyar kwallon kafa ta Manchester City, Matheus Nunes bisa zargin satar wayar hannu a wani gidan rawa a birnin Madrid na kasar Spain.
Ana zargin cewa ana tsare da dan wasan mai shekaru 26, dan asalin kasar Portugal tun ran 8 ga watan Satumba a La Riviera, inda daga bisani a ka kaishi caji-ofis din ‘yan sanda don amsa tambayoyi kamar yadda Dailymails ta rawaito.
An kama Nunes ne bayan an zarge shi da karbe wayar wani mutum mai shekaru 58 wanda yayi yunkurin daukar sa a hoto a bandakin gidan rawar ba tare da amincewar sa ba, acewar jaridar kasar Spaniya ta Daily El Mundo.
Rahotanni sun ce dan wasan ya kwace wayar cikin fushi kuma yaki dawo da ita.
El Mundo yayi bayanin cewa ‘yansanda sun kama shi ne bayan an kirawo su zuwa wurin kuma suka samu wayar a aljihun sa.
