An Kammala Wasar Karshe Ta Cin Kofin Cikar Shekara Dayar Zannan Bungudu A Karagar Mulki
DAGA SHAMSU BELLO BUNGUDU
A yau ne aka Gudanar da wasar Karshe na cin Kofin kwallon kafa na bukin Cikar Shekara daya akan kujerar Mulkin kananan hukumomin Bungudu da Maru na Abdulmalik Zubairu Zannan Bungudu.
Wasar wadda tasamu halartar manyan jiga jigan Jam’iyar APC na Fadin jihar Zamfara wadanda suka hada da Shugaban Jam’iyar APC na Karamar Hukumar mulki ta Bungudu Alhaji Kabiru Dan kulu, Tsohon Shugaban Karamar Hukumar mulki ta Bungudu Hon Maiturare Sadik, wakilin shugaban Jam’iyar APC Na jihar Zamfara Alhaji Balan vice, Honarabul Nasiru Zurmi, Tsohon Shugaban Karamar Hukumar mulki ta Gusau Alhaji Ahmad Muhammad Bagu, Honarabul Ummaru Dan Mai Gadi, Honarabul Suleman Tunau Anka da dai sauran su.
An dai gudanar da wasar ta Karshe tsakanin Kungiyar kwallon kafa ta Roma FC da Bungudu Academy, inda Kungiyar ta Roma tayi Nasara da ci Daya da Nema 1-0.
Da yake jawabin godiya Dakta Abdulmalik Zubairu Bungudu Zannan Bungudu ya yabawa matasan da Suka kirkiri wannan Wasa inda yace tabbas sunyi abun ayaba La’akari da cewa Wasan kwallon kafa na Daya daga cikin wasanni da suke hada Kan Matasa.
Dan Majalisar yakuma gwangwaje kungiyoyin kwallon kafan da Suka fafata a wannan gasar, da Kuma gwarazan yan Wasa da sukayi fice da kyautuka daban daban, yayin da kungiyar kwallon kafa ta Valencia FC wadda tazo Mataki na uku a gasar Suka samu Kyautar naira dubu dari 100,000 sai kuma Kungiya ta biyu wato Bungudu Academy Naira dubu 200,000 sai Kuma Kungiyar Roma FC wadda ita ce tazo a Mataki na Daya itama ta amfana da Naira dubu 200,000 da sauran kyaututtukka.
Daga Karshe Dakta Abdulmalik Zubairu Bungudu ya godewa daukacin Al’umar da suka halarci wannan buki na Kammala gasar kwallon kafar wadda aka shirya domin tayashi Murnar Cika Shekara daya a Kan karagar mulkin kananan hukumomin na Bungudu da Maru, inda ya roki Allah subhanahu wata’ala da ya Kara hada Kan matasan wannan yanki ya Kuma Kara kawo cigaba da Soyayyar juna a tsakanin su.
