Gwamnatin jihar Borno ta sanar da mutuwar Kwamishinan Kudi na jihar Alhaji Ahmad Ali Ahmad
A wata sanarwa da Kwamishinan watsa labarai da harkokin cikin gida Farfesa Usman Tar ya fitar ta ce, marigayin ya rasu ne a cikin ɗakin sa.
Rahotanni sun ce an ɓalle ƙofar ɗakin sa ne bayan an ga ya wuce lokacin da ya saba fitowa, aka kuma yi ƙoƙarin tuntubarsa, amma ba a same shi ba.
Shi ne kwamishinan gwamnatin Borno na biyu da ya mutu a cikin shekara guda.
Domin ko a watan Oktoban 2023 ma kwamishinan gine-gine da sake tsugunar da mutane Injiniya Ibrahim Idriss ya rasu a jihar ta Borno.
